समाधिचिया गावी जाण
वस्तीसी आले महाशुन्य
ते टळटळीत एकलेपण
आदिअंतविहीन गा
जे घडतचि नाही काही
तयाचे वृत्त सांगावे काय
आनंद शान्ति ज्ञानही
मुरुन गेले आपणांत
त्या महाबोधाच्या ठायी
सुखदु:खाची वार्ता नाही
अहम् इदम् बुडाले दोन्ही
तत्स्वरुपी ईश्वरा
अखंड तृप्ति समाधान
परेच्याही पैल खूण
जाणीव नेणिव परिमाण
उरले नाही भगवंता
तुझी कृपा सद्गुरू
गणतीसी माप काय करू
अथवा तुझे पाय धरु
कळेना मज गरीबासी
हरि ॐ तत्सत्
*
तो ईश्वरच शाश्वत सत्य आहे
