मोठेपण

नको देवा असे

पाय दाबू माझे

ऋणाचे हे ओझे

फेडू कसे

नको देवा असे

सवे माझ्या फिरू

नको लाड करू

माझे देवा

असे म्हणता मी

देव तो रूसला

देव्हारी बैसला

चिडीचूप

तोंडावरी बोट

हातांची ती घडी

पायांची ती मांडी

घाली देव

असे काय देवा

सोंग तू आणले

मला ना रूचले

बिलकूल

किती वेळ बसू

अवघडुन मी

एवढ्याशा धामी

देव म्हणे

आता पुन्हा कधी

नाही फिरणार

तुझ्याबरोबर

म्हणे देव

असे म्हणता तो

झालो मी खजील

आता ना फाजील

बोलणार

तुझी लीला देवा

कळते तुलाच

अडाणी मी साच

भक्त तुझा

तुझी इच्छा मज

शिरसावंद्य रे

मोठेपण खरे

तुझे देवा

स्तब्ध

पापकर्मांची सजा ही

भोगणे जे प्राप्त झाले

त्याच दुःखातून ह्रदयी

देखणे हे कमळ फुलले

त्याग ना सगळ्या सुखांचा

जोवरी जमला मला

तोवरी मी तळमळूनी

अंती ईश्वर पाहिला

स्त्रोत हर्षाचा जगी या

शांतीमधुनी उमलतो

त्याविना कोणी जगी ना 

ईश्वराला पाहतो

वैर वेड्या वासनेने

शांततेशी मांडले हे

उमगले ज्याला तयाने 

ईश्वराला जाणले

योगी मी संन्यस्त जेव्हा 

सर्व इच्छांमधुन झालो

कर्मयोगी राहूनी मी

नैष्कर्म्यास पावलो

आता जाणे राम मजसी

तोच करतो तोच देतो

स्तब्ध मी करतो न काही 

राम कृष्ण हरी बोलतो

पांडुरंग हरी

गीत

काळजाशी मी तुला कवटाळतो 

 आणि हळवे भक्तीचे हे गीत गातो 

लाडक्या देवा तू असशी सर्वव्यापी 

प्रीतीने सगळीकडे मी न्याहाळितो 

काय वरचा रंग आणि रूप पाहू 

जाणतो सगळीकडे तू नांदतो 

अगा माझ्या ईश्वरा सच्चिदानंदा 

समानचि  सर्वत्र मज तू भेटतो 

ज्ञान मजसी तू दिले गुरु होऊनी 

दयाळा मी तुज स्वरूपी पाहतो 

श्रीमंत दगडूशेठ गणपतीच्या चरणयुगुली अर्पण 

ॐ गं गणपतये नम: 

एकांत

ॐ  

बाह्य जगत् सोडावे 

आत आत जावे

तळ मनिचा गाठुनी 

निवांत सुखी व्हावे 

कोणीही नसावे 

संगती सोबतीला 

एकांती वनीचे 

नाजूक फूल व्हावे 

आपुल्या सुगंधाने 

आपण मस्त व्हावे 

चरणी परमेशाच्या 

स्वतःस अर्पावे 

ॐ