प्रसाद

तुझे नाम सोपे गाईन विठ्ठला
अन्य काही मला छंद नाही
काहीच सुचेना तुझ्याविना रामा
जीभ तुझ्या नामा घोकतसे

तुझ्याच रुपाचा नयनांस ध्यास
जीव कासाविस तुझ्यासाठी

जळो ते रुपये जळो कामकाज
माझी तजवीज रामा करी
अनन्य भक्ती तू देशील गोविंदा
मज मतिमंदा पोसशील
तुझा बळहीन गुलाम मी देवा
भरोसा तू द्यावा दीनालागी
दुर्बळांची रामा राखतोस पाठ
तूच मायपोट अनाथांचे

तुझ्या लीलेमध्ये मी नाही येणार
मी नाही जोजार करणार
खुश राहो सारे नको कुणा दु:ख अखंडित सुख आत्मलाभ

तुझ्या विरहात नको लोटू मज
देवा हितगुज ऐक माझे

पुरा झाला माझ्या भेजाचा कबाड़ा
तुझा झालो वेडा प्रेमपाशी

लाविलेस पिसे मजसी केशवा
सोडून माधवा जेऊ नको

संतांचे उष्टे मी खाऊन जगेन
चरणी राहीन दास तुझ्या

*
मच्चित: सर्वदुर्गाणि मत्प्रसादात्तरिष्यसि ।
अथ चेत्त्वमहंकारान्न श्रोष्यसि विनंक्ष्यसि ।।

*

ॐ
राम कृष्ण हरि
ॐ

*

हरि ॐ तत्सत् 

*
 

समाधि

समाधिचिया गावी जाण
वस्तीसी आले महाशुन्य
ते टळटळीत एकलेपण
आदिअंतविहीन गा

जे घडतचि नाही काही
तयाचे वृत्त सांगावे काय
आनंद शान्ति ज्ञानही
मुरुन गेले आपणांत

त्या महाबोधाच्या ठायी
सुखदु:खाची वार्ता नाही
अहम् इदम् बुडाले दोन्ही
तत्स्वरुपी ईश्वरा

अखंड तृप्ति समाधान
परेच्याही पैल खूण
जाणीव नेणिव परिमाण
उरले नाही भगवंता

तुझी कृपा सद्गुरू
गणतीसी माप काय करू
अथवा तुझे पाय धरु
कळेना मज गरीबासी

हरि ॐ तत्सत्
*
तो ईश्वरच शाश्वत सत्य आहे

पाईक

तुझ्या प्रेमास मी पात्र होण्यासाठी
सांग जगजेठी काय करू

आसवे सांडली शब्द ओसंडले
जीवास वाहिले पायी तुझ्या

तुझ्या दरबारी पत माझी नाही
दर्शनसुखाचेही भाग्य नसे

कळवळे काळीज तुझ्यासाठी रामा
अनर्थास क्षमा कर बाबा

चुकांचा पर्वत मूढ भक्तीहीन
दीन मी शरण आलो तुज

तुझ्या चरणांच्या सेवेचा पाईक
होवो मी आणिक काही नको

ग्रहणाच्या राती उजळावी स्मृती
हीच फलश्रुति द्यावी देवा

भक्तीचे फळही भक्ती हेच असो
तुझ्या पदी वसो सुख माझे

अज्ञान हरपो माझे सच्चिदानंदा
कैवल्याच्या कंदा सगुणस्वरूपा

ॐ
साईराम
ॐ

वैराग्य

एषणात्रय सांडले मी आत्मस्वरुपी ईश्वरा
तूच मी अन मीच तू अद्वैतबोधप्रकाश हा

प्रीत माझी तुझी रामा तूच जाणे ईश्वरा
दुर्बळांनी काय ल्यावा सतीचा श्रृंगार हा

अखंडैक्ययोग रामा तुझा माझा ईश्वरा
कामनेसी ठावा ना वैराग्य कीर्तन रंग हा

तेवते सुख शांत ज्योती नित्य ह्रदयी ईश्वरा
लाभले निजश्रेय माझे माझा आत्माराम हा

ॐ

रामचरणदास

सैरभैर झालो मी काहीही सुचेना

कुठे जाऊ सोडून तुज सांग रामराया

तुझ्याविना रामा मज जिणे कंठवेना

का रुसला माझ्यावर सांग रामराया

काय भार झालो मी तुजसी पोसवेना

कष्ट तुला दिले का मी सांग रामराया

तुझे चरण प्रिय मजसी जवळ राहू दे ना

दास तुझा आहे ना मी सांग रामराया

तू माझा तुझाच मी अन्य कुणाचा ना

तुझे पाय सुख माझे सख्या रामराया

अस्ति भाति प्रियत्वे तू सर्वस्वी माझा ना

विभुर्व्याप्य चैतन्या सांग रामराया

ॐ

माता रामो मत्पिता रामचंद्र: स्वामी रामो मत्सखा रामचंद्र:

सर्वस्वं मे रामचंद्रो दयालुर्नान्यं जाने नैव जाने न जाने

ॐ राम कृष्ण हरि ॐ

भेदु लाजौनि आवडी।येकरसी देत बुडी।

जो भोगणया ठाव काढी।द्वैताचा जेथे।।

ॐ

सद्गुरु

तू माझे रूप आहेसी
सद्गुरु मला बोलती
शिष्य बनवुनी नेती
गुरुत्वासी

तू व मी नाही वेगळे
गुरुतत्व तुझ्यातले
सगळीकडे भरले
जगन्मात्री

पांडुरंग तू पाहसी
तयाची जगी वसति
वस्तु नसते कोणती
तयाविन

अनेकत्व जे दिसते
काजळी माया असते
ती सारिता उजळते
ज्ञानज्योती

तू नव्हताच अज्ञानी
घाबरला उगी स्वप्नी
आपुल्या स्वरूपज्ञानी
आता मिळ

" मी" व "माझे" शब्द त्याग
विठ्ठलाचे रूप जाण
अनन्यभावे शरण
त्याचा होई

रणात हा कृष्ण म्हणाला अर्जुना
मारले वै-यांना मीच स्वत:
फक्त तू धनुष्य बाण हाती धर
श्रेय तू स्वीकार माझ्या भक्ता
समाधि स्थितिच्या या चौरंगावर
बसून तू कर अज्ञानाचा नाश

दिला अहंकार बळी
नाला मिळे गंगाजळी
थेंब मिळे वर्षाकाळी
सागरास

साईने हरली चिंता
साई कर्ता करविता
मी तयाचे पाय ध्याता
सुखी होई

ॐ राम कृष्ण हरि ॐ

सूचना - स्वत:मध्ये विठ्ठल पहायचा असेल तर
१} शिव्या देणे बंद करा
२} नशा दारु पिणे बंद करा
३} मटन मासे कोंबडी खाणे,
मांसाहार बंद करा
४} संयम पाळा
५} देवाच्या नामाचा जप करा
ॐ

एल्गार

तुझे नाम रामा मी घेणार नाही

असा नेम केला जरी मी किती

जिव्हा बोलते ऐकते नाम श्रुति

घोंघावते मन तुझ्याभोवती

अनाहत संकीर्तन तुझे येई कानी

सुगंध तुझा घ्राणि येई दिव्य

रुसण्यात माझ्या नसे अर्थ देवा

तुझ्याविना जीवा नसे माझ्या ठाव

नसे तू जिथे नेत्र पाहती तुला

कसे सांग रामा मी सोडू तुला

का वेड तू लाविले सांग मजला

दश इंद्रियांनीही एल्गार केला

माझा म्हणुनी पोशिला आजवर मी

अहंकार तोही ना माझा उरला

तू काय गारुड केलेस रामा

सगळ्यात मज तू दिसे एकला

स्वतंत्र नाही मी तुझा गुलाम

वेटाळुनी घातला प्राणबंध

तुझा मी तुझा मी अगा रामचंद्रा

युगानुयुगे आपुला हा संबंध

हजारो मुखांनी तुझी कीर्ति गाता

वाणी अपुरी शब्द विलयास जाती

विश्वात्मका मी तुझा शेष आहे

तुझ्याविना जरी नसे काही जगती

ॐ

कुठे जासी

तव भक्तीची उन्नत शिखरे
एक एक मी आक्रमितो
कधी प्रेमाने हर्षित होतो
कधी विरहाने व्याकुळतो

तुझ्या नि माझ्या प्रेमाचा हा
रंग आहे भलताच जुना
जीव शिवाच्या लपाछ्पीच्या
अनादी या दिसतात खुणा

अज्ञानाच्या अवगुंठनी मी
तू मायेच्या पडद्यात
तू माझा मी तुझा असुनी
मी व्यर्थ पोळतो दु:खात

विसरुनी तुज मी व्यथित होता
अवचित येतो तू पुढती
खुद्कन माझी कळी उमलते
सर्व व्यथा पळुनी जाती

तुझ्या मनीचे तूच जाणसी
मेहरबान जरी होसी तू
पुन्हा सोडुनी मला एकटा
कुठे फिराया जासी तू

ॐ

राम आहे

राम आहे राम आहे
राम कणात कणात
राम आहे राम आहे
राम देहात प्राणात

रामा तुझ्या आस्तित्वाचा
विसर मला पडत नाही
क्रोधाचे आणि दु:खाचे
चरे मनावर पडत नाही

तू आहेस म्हणून रामा
माझी फरफट होत नाही
कसल्याही भीतीने माझी
ससेहोलपट होत नाही

रामा तुझा आधार मला
जगण्यासाठी बळ देतो
तू सोडून गेलास तर
मी मातीमोल होतो

ॐ

प्रेम

तुझ्या इच्छेसाठी जगतो मी देवा
चैतन्याचा ठेवा घेउनिया

आता नाही काही मज मिळविणे
काही हरवणे उरले नाही

एक मी एक तू दूजे नाही काही
एक हरि पाही चोहीकडे

शब्द हे सांडती चांदण्याची फुले
देवा उतू गेले प्रेम तुझे

सद्गुरुराया तुझ्या पायी माझी डोई

नाही उतराई होणे मज

ॐ

समाज

भोगलोलुपता नांदते इकडे
दारिद्रयाचे मढे एकीकडे

एकाला मिळेना चिंधी ल्यावयाला
नाचे बारबाला वस्त्रहीन

गडगंज कुणी बांधले इमले
कष्टकरी चाले अनवाणी

दुस-याचे दु:ख आम्हा ना डाचत
रोटी नाही देत कुणा कधी

मग्रुरीचे सारे झालेत अधीन
विचारतो कोण सज्जनाला

वाईटाच्यासाठी चढाओढ चाले
सगळेच झाले कष्टी फार

अतिरेकापोटी जातात गाळात
कुतरओढीत प्राण जाई

*
आधार शोधू नको
आधार हो
*
या देवी सर्व भूतेषु शक्तिरूपेण संस्थित:
नमस्तस्यै नमस्तस्यै नमस्तस्यै
नमो नम:
ॐ

कार्य

कार्यही करावे भार मानु नये
करणारा आहे रामचंद्र

कर्तबगारीने फुगू नये आम्ही
अपयशानेही खचू नये

रामाच्याशिवाय पानही हलेना
जाणून हे घ्या ना सत्य मनी

सर्वशक्तिमान असताना राम
आम्ही कोण काम करणारे

जेवढी ताकद आम्हा दिली त्याने
तेवढे करणे जीवेभावे

दुस-यांच्या कार्याकडे पाहू नये
स्पर्धा करू नये दुस-याशी

आळस सोडून यत्न चिकाटीने
करीत राहणे झेपेल ते

त्याच्या इच्छेवर झोकुनिया द्यावे
व्हायचे ते व्हावे परिणाम

राम सूत्रधार सद्गुरु बोलले
आपण बाहुले बळहीन

मिळेल तेवढी भाकरी खाऊनी
राहू समाधानी हरीकृपे

ॐ